بقلم / كريمة الشقري ،
قالوا مات قالوا إتحرق،، أنا قلت ميت من زمان .
قالوا ياناس عمره إتسرق،،قلت ذنبه إنه غلبان.
عاش ومات مافرق،، كان فاكر نفسه إنه إنسان.
آااه الوجع تسمعها لأ،،على كل ظلم من زمان .
ماشيين نموت راكبين نموت، حتى إللي مستني كمان.
قالوا مات قالوا إتحرق، ، أنا قلت ميت من زمان .
آااه يارصيف الموت،، ياإللي نقيت الناس الغلابة .
راحوا وارتاحوا من غلبهم،وسبوها رايقة للديابة.
قالوا مات قالوا إتحرق، ،أنا قلت ميت من زمان.
قابلت أم ع المحطة، ،، تبكي تقول أبني عريس .
كان شغال ف المحافظة، وكان بيروح بالأتوبيس .
ولما ضاقت الظروف،، قال ياأمه القطر رخيص .
طلعت ياابني أنت الرخيص، وجبنالك كفن عريس.
قالوا مات قالوا إتحرق، ،أنا قلت ميت من زمان.
وع المحطة طفل صغير، قال أبويا كان هنا.
راح يجيب لقمة ناكلها،، قبل ما نسافر قنا .
كنا نازلين أجازة، ، عشان فرح أختي هنا .
آاه ياأبويا مت ليه،، كان نفسك تدوق الهنا.
قالوا مات قالوا إتحرق، ،أنا قلت ميت من زمان.
