كتب.. عاطف انيس
بيساو إسمه توني سيلفا، لكنه لاعب مش ملتزم وبتاع مشاكل وعقليته مش سليمة لدرجة انه لعب مع 13 فريق في 7 سنين، بعدها موسيماني أصدر قرار بالإستغناء عن اللاعب دا، وقرار لا رجعة فيه، الإعلام ضغط علي موسيماني وطالبوه بمنح اللاعب فرصة جديدة، وقالوا ازاي تمشيه دا من ناشئين ليفربول وكان معار لساوثهامبتون.. وبعد ما اللاعب مشي وراح لـ الاتحاد السكندري، بدأ يهاجم بيتسو ويصفه بالمدرب اللي بيحب ويكره وبدأ يقلل منه.. الإعلام كان متوقع انه بعد ما يمشي دا هيضر صن داونز ومش هيلاقوا موهبة زيه، لكنه لما مشي راح للاتحاد السكندري لعب 7 ماتشات معملش حاجة وتم فسخ التعاقد بسبب عدم الالتزام وسبق واتغرم ماليا بسبب عدم الالتزام، وحاليا بيلعب فين؟ بيلعب في الدوري الكازاخستاني! اه والله، طب وموهبته الفظيعة؟ معملش بيها حاجة، لكن نادي صن داونز ومدربه السابق متضروش وكملوا في طريقهم وحققوا بطولات وآخرهم ثلاثية، وحاليا موسيماني بيدرب أفضل نادي في تاريخ افريقيا وعنده سيمي فاينال الأبطال
موسيماني بيعشق اللاعب الحريف، لكن دا لو كان ملتزم وصاحب عقلية تؤهله للتتويج بالالقاب، ودا كان باين من أول تصريح قاله بعد ما اتولي مهمة تدريب الاهلي. قال لازم نتأكد هل عقلية فريقنا جاهزة للتتويج بدوري ابطال افريقيا أم لا، ورجع تاني كرر الكلام في لقاء مع قناة الاهلي، ورجع تالت كرر الكلام في المؤتمر الصحفي.. موسيماني استبعد فلان وفلان، ازاي يضم فلان، ازاي يعمل كدة.. دا طبعا الكلام اللي وارد نشوفه من فئة من الجمهور! لكن هو حر، هو اللي ماسك الفريق وبيدرب اللاعيبة وعارف مين يصلح ومين لأ، مفيش لاعب عقليته فاسدة وبينجح، مفيش لاعب أهم من المجموعة حتي لو كان مين
كامل الدعم لـ موسيماني وقراراته ونتمني لك التوفيق مع نادينا العظيم .. الأهلي فوق الجميع .. ومصلحة الأهلي فوق أي شئ
