أنا المرفوض م الزمن

وبتسند على نفسى
وبفضل واقع من روحى
وأحاول أحبس الدمعه
بلاقى دموعى تنزل دم
وبنزف كل يوم أكتر
واقول بكرة أفوق من الجرح

فكل ما بلمس الضحكة
بسرعه بتتحدف على الأرض
ما يمكن كل چيناتى كدة وراثه
ومش مكتوب
فى تكوينى يا ناس الفرح
وبفضله عايش انا حيران
وعشمان أكون واحد صحيح
لكن

حياتى كلها بالنص ….
ما بين موتى وبين عايشه
ما بين جامدة وبين بايشه
مريض أيوة بالتفكير
بلف فى حبل أفكار
فبالتدريج
يسيب فيا يا ناس علامات
خدوش ظاهرة

ومهما بدارى فى عيوبى
بتظهر كل يوم أكتر
فبتمنى ساعات الموت
وأشوف فى جنازتى
وياهم دموع فُرقه
فلو بصيتوا جوايا
تقولوا البخت ليه مايل
اكيد حظى كتير منحوس

أنا آسف لنفسى كتير
بسيب ضلمه وأعديها
وأمد برجلى أدخل قبر
وبتمصمص على حالى
وبفضل أعزم النومة
تزور عينى بدون تفكير
ياريت عمرى يكون بدايات
فكل بدايه تتجمل عشان رجلى تخطيها
وبتفاجىء بإنى وقعت فى الحفرة
وبطلع منى بنزل تحت