بقلم / إيمان نسيم
يوسف جرجس مخترع مصري تفوق على الصينيين وتمكن من أختراع غسالة تعمل بالموجات الكهرومغناطيسية.. ويطالب الشباب بعدم الاستسلام والصبر ومواصلة السعي.
هذا ما فعله «يوسف جرجس» الذى يبلغ من العمر ٢٥ عاما، بعد أن نجح فى أختراع غسالة تعمل بالموجات الكهرومغناطيسية.
يقول: «بعد الحصول على الشهادة الثانوية التحقت بكلية العلوم قسم الفلك وأثناء دراستى بالجامعة، بدأت شغل في مؤسسة لتصنيع واستيراد وتصدير الإكسسوارات الحريمى في الصاغة، وبعدها بدأت كمصور للمنتجات ثم مصمم موديلات ثم البحث والتطوير ثم مدير تنفيذي، وأنا في الفرقة الثالثة حبيت أن أبتكر شيئا جديدا يفيدنى ويفيد بلدى والعالم، فكان أول ابتكار لى موديل (دلاية) بمواد كيميائية والحمد الله عملت منها كميات كبيرة وبعناها».
وأضاف: «عملت برضو جهاز بيعمل حاجة اسمها electroplating طلاء المعدن بالكهرباء، ده عبارة عن جهاز ومعاه مواد كيميائية بتتفاعل مع الكهرباء بتتطلى أى معدن بالألوان (لون الدهب- الأسود) ويستخدم في صناعة الفضة والدهب الصينى وفى أكثر من ٦ ورش شغالة بالجهاز ده».
وأكمل: «بعد أن تخرجت من الجامعة قررت أن أفكر في اختراع بعيد عن المجال دراستى وفى نفس الوقت نستفيد منه ونفيد العالم، فخطر في بالى فكرة أن زخترع غسالة تعمل بالموجات الكهرومغناطيسية، أول ما الفكرة جاتلى عملت أبحاث ودورت على البلاد اللى بتشتغل في المجال ده وعرفت إيه الحاجات إلى هأقدر أجيبها وأعملها في مصر وإيه اللى مش متاح، ثم قررت أسافر الصين علشان أتفرج على المكونات إلى هستخدمها وإيه الحاجات اللى مش موجودة في مصر وأجيبها من هناك، وكمان كنت عايز أتفرج الناس هناك شغالة ازاى والتكنولوجيا وصلت لفين عندهم، وسافرت الصين في شهر يناير وقعدت أسبوعين هناك ورجعت بدأت في المشروع».
وأضاف أن الاختراع استغرق ما يقرب من ٩ أشهر، وكنت أشتغل على الاختراع بغرفتى في المنزل لعدم وجود مكان بديل أشتغل فيه، ووجدت تشجيعا ومساندة من والدتى في تنفيذ الاختراع، وأشار وعندى طموح أصدر الجهاز بره مصر وأى اختراع يعمله أى مصرى عشان تكون مصر في المقدمة، مطالبا الدولة بتوفير الإمكانات والأدوات اللازمة لتنفيذ باقى الاختراعات.
ووجه يوسف رسالة قائلا: «أى شاب عنده فكرة متستسلمش وخليك مصر على تنفذ فكرتك مهما كانت الصعوبات إلى هتواجهك وخلى عندك هدف لازم تحققه»
