قولى يا عم حنا
المحبة فين أراضيها
هية ليه بعدت عنا
حتى مسابتش ماضيها
اتكلم يا عم المقدس
رد و حياة الصليب
هو زمن المحبة أتلوث
ولا ضى الهلال بيغيب
احكى عن ايام زمان
اللى كان الحب ماليها
ولا خلاص فات الأوان
ولا معدش مكان ليها
ساكت ليه يا عم حنا
اتكلم بقى يا عم الشيخ
الدنيا مش هتبقى جنة
من صوت الآلى و الصواريخ
هو حبل المحبة داب
ولا اتقطعت خيوطه
رد عليا بأى جواب
الناس من الشر بيموتوا
يا أبونا و حق المسيح
يا شيخنا و حق نبينا
هو الحب اندفن صحيح
ولا مات جوانا و بينا
فين المحبة يا مولانا
مبتردش ليه يا ترى
ولا خلاص ماتت جوانا
ولا ايه اللى جراه
فين المحبة فين
حد يجاوب سؤالى
أروح اسأل مين
اه يالهوى بالى
يا عم حنا حب عدوك
زى ما قال الأنجيل
سامح كل اللى ضدك
ده شيء مش مستحيل
يا عم حنا قول لمحمود
الإسلام دين سلام
أقسم له بربنا المعبود
أنه مش مجرد كلام
كلمات : محمد فتحى
