⚽ تحليل مباراة الأهلى ومصر المقاصة ⚽

كتب..عاطف انيس

❤️ الأهلى يطمأن جماهيره قبل مباراة الحلم الإفريقي ❤️

🟠 شوط أول بعنوان ( كان فى الإمكان أفضل مما كان )🟠

🟣 بدأ الشوط الأول بجس نبض ومحاولة فرض السيطرة من الفريقين نتج عنه بعض العشوائية واللخبطة والتمريرات المقطوعه فى أول ١٠ دقائق وبعدها ظهر فريق المقاصه متماسكا وبيحاول الضغط من الأمام عشان يحرم لاعبى الأهلى من التحضير وبناء الهجمه والتدرج بالكرة من الخلف للأمام .

🟣 أحد سلبيات الشوط إن الأهلى وقع فى مصيدة التسلل (٤) مرات مع إن عندنا أكثر من لاعب بيعرف يضرب التسلل.

🟣 السلبيه الثانيه هى عدم قيام الشحات بالدور الدفاعى لمساعده اكرم عشان كده الجبهه كانت مستباحه للمقاصه والهدف منها

🟣 همسه فى أذن أيمن أشرف إرحمنا من التهور خصوصا داخل منطقه الجزاء تسببت فى ضربه جزاء برغم انك أديت بشكل جيد

🟣 الجميل إن الأهلى مستناش كتير وبعد دقيقتين تلاته طبق الضغط الأمامى والتواجد بكثافه فى نص ملعب المقاصه واشتغل على الكرات العرضيه اللى سجل منها شريف أول أهدافه من ضربات الرأس والجميل فى الهدف الكثافه داخل منطقه الجزاء بوجود أجاى على القائم القريب وشريف على القائم البعيد وبعده قفشه وعلى حدود منطقه الجزاء كان واقف الشحات عشان الكرة الثانية .

🟣 ليه بقول كان فى الإمكان أفضل مما كان لأن الأهلى سدد على المرمى( ٦ )تسديدات منهم ( ٢ )فقط بشكل صحيح وده رقم سلبى وعملنا ( ٩ )كرات عرضية منهم ( ٥ ) فقط بشكل صحيح وده بردو رقم سلبى علاوة على الرعونه فى إضاعة الفرص .

🟣 طبعا الأهلى عشان يضرب دفاع المقاصه المتقدم كان لازم يشتغل اكتر على اللعب السريع و الكرات الطولية اللى وصلت ل ( ٣٥) كورة طوليه منهم ( ٢٣ ) فقط بشكل صحيح وطبعا الفرق ده هو اللى قلل فاعليه الأهلى لأن فى كرات طوليه كتير يا إما كانت مقطوعه يا إما كانت متأخرة ووقعنا فى مصيده التسلل .

🟠 شوط ثانى بعنوان ( لا تخافوا ولكن إحذروا ) 🟠

🟣 بدأ الشوط الثانى وكان واضح على لعيبه الأهلى الإصرار على تحقيق الفوز وإستغلال ما لم يتم إستغلاله فى الشوط الأول .

🟣 لم ينتظر موسيمانى كتير على أجاى اللى لسه مجابش فورمته ومحتاج لسه يخس شويه عشان يكون اخف من كده وقرر بيتسو يدفع بصلاح محسن البديل السوبر .

🟣 إستمر الأهلى فى تطبيق الضغط واللعب الجماعى واللامركزية اللى كان مميز جدا فيها قفشه أحد نجوم المباراة والشحات اللى كان بيتبادل المراكز معاه وبرؤية يحسد عليها قفشه يضع شريف نجم المباراة وجها لوجه بحارس المقاصه وبحاسه الهداف يحرز هدف من أجمل الأهداف .

🟣 طبعا وكآفه التحكيم المصرى ال var بيه يلغى هدف صحيح للأهلى ومش عارف اللى قاعدين فى غرفه الvar شافوها تسلل ازاى 🤔🤔🤔

🟣 لم ييأس لاعبى الأهلى وإستمروا على نفس الطريقه والكرات الطوليه اللى وصلت فى الشوط الثانى ل ( ٤١ ) كرة ومن رؤيه وحساسية ودقه تمرير عاليه من المايسترو السوليه يلعب كرة فى عمق دفاع المقاصه الشحات اللى قلنا إن بيدخل للعمق وبلمسه سحرية يحطها لشريف عشان يسجل الهدف الثانى ومن ضربه رأس أيضا .
🟣 يحسب للشحات النهاردة تحرره واستعادته كتير من مستواه فى ال( ٧٢ ) دقيقه اللى شارك فيهم مرر الكورة( ٣٩) مرة منهم( ٣٤ ) بشكل صحيح بدقه تمرير وصلت ل( ٨٧%) وصنع هدف وعمل( ٢ )تمريرة حاسمة ويبدو أن النينجا فى طريقه للعودة .

🟣 بعدها قرر موسيمانى إجراء تغييرات للراحه والتنشيط واعطاء الفرصه فقرر خروج الشحات وحمدى فتحى ونزول كهربا و ديانج

🟣 طبعا كنت أتمنى أن كهربا يلعب طرف شمال عشان يقدر يكهرب الماتش ونشوف أعلى فولت لكن لوجود صلاح محسن فى الملعب فلعب كهربا طرف يمين مع إعطاؤه مهام الدخول كمهاجم ثانى وطبعا اخد نفس التكليفات اللى كان وخدها الشحات وكان بيضم للداخل ويتبادل المراكز مع قفشه ولعب اكتر من مره فى عمق دفاعات المقاصه وكان بيحاول يقول أنا موجود .

🟣 انتفض الأهلى فى أخر ١٠ دقائق وده بسبب إستسلام لاعبى المقاصه اللى شعروا بالفوارق الكبيرة بينهم وبين لاعبى الأهلى واستمر الأهلى فى اللعب السريع وضرب الخطوط بالمسه الواحده وبمريرة من المتألق السولية لقفشه فى المساحه اللى بين خط وسط وخط دفاع المقاصه عشان يكمل شغل اللمسه الواحده ويحطها لشريف أفضل مهاجم يقدر يظبط نفسه مع اخر مدافع عشان يضرب مصيده التسلل ويسجل الثالث ولكن نصيبه أنها تتحسب بإسم مدافع المقاصه .
🟣أجرى موسيمانى اخر تغييرين بنزول مروان ومحمد هانى وخروج محمد شريف وأكرم والحمد لله واضح أن هانى واقف على رجله وعايز يثبت نفسه ومروان كمان كان ليه محاولتين على المرمى .
🟣 عايز اقول لمحمد شريف شابو 👏👏👏 انك بتطور من نفسك وبتحاول تشتغل على الناقص اللى عندك والنهارده لعبت ٣ ضربات رأس سجلت منهم هدفين والحارس أنقذ هدف وبرغم انك من اقل اللاعبين لمسا للكرة لكنك أكثرهم فاعليه .

🟣 الكورة دائما بتكافأ حبيبها واللى عمله قفشه النهارده لازم نشكر عليه الأول رفاعى الدسوقى ( مخطط الأحمال ) 🤣🤣🤣🤣

🟣 لما تكون الدقيقه ٩٠ والفريق متقدم ٣ /١ والكل خلاص بيلعب على الواقف وييجى صانع ألعاب يضغط ويستخلص ويكون عنده رؤيه وحساسية كده ويسجل من نص الملعب بالشكل يبقى الجانب البدنى على أعلى مستوى لأن الجانب البدنى بيأثر على الجانب الذهنى إما بالإيجاب أو بالسلب والنهارده الكورة كافأت قفشه 🎩
اللى سجل هدف وصنع هدف و مرر ( ٤٦ )تمريرة منهم (٣٩ ) بشكل صحيح بدقة تمرير وصلت ل ( ٨٥%) وسدد على المرمى ( ٤ ) مرات منهم مرتين بشكل صحيح وعمل( ٥) تمريرات طوليه منهم( ٤) بشكل صحيح وعمل تمريرة حاسمه .

🙏 الحمد لله فوز كبير ومهم ويعطى الثقه والطمأنينة قبل مباراة الحلم الإفريقي اللى هتكون مختلفه طبعا عن مباريات الدورى ولكن اللى مطمنى إستعاده معظم لاعبى الأهلى لمستواهم المعهود .

❤️❤️