في سنة 1960 كانت بداية المسيرة الفنية الأهم في تاريخ السينما العربية

كتب.. عاطف انيس

كانت بداية مسيرة الزعيم عادل إمام في مسرحية اسمها ثورة القرية وكان عادل إمام أخد دور صغير في المسرحية وقام فيها بدور بياع نداغة، يحمل صينية ، وكان بيقول في المسرحية دي جملة واحدة بس وهى ” حلاوة سمسمية بمليم الوقية” وبعد كدا ب3 سنين سنة 1963 اختاره عبد المنعم مدبولي لعمل شخصية”أستاذ دسوقي” في مسرحية أنا هو وهي نجح عادل إمام في الشخصية واشتهر بجملته الشهيرة “بلد بتاعت شهادات صحيح” بعد كدا سنة 1964 في فيلم أنا وهو وهي بشخصية أستاذ دسوقي وكان استثمار لنجاح المسرحية بعد كدا اتعرض علي عادل إمام أدوار كتيرة يظهر فيها بشخصية أستاذ دسوقي لكن عادل إمام رفض ولو كان وافق كان اتحصر في دور أستاذ دسوقي طول عمره زي ممثل كان اسمه محمد فرحات كان اشتهر بشخصية اسمها “الدكتور شديد” وفضل يقدمها طول عمره ومعرفش ينجح في شخصية غيرها بعد كدا سنة 1966 شارك عادل إمام بدور في فيلم مراتي مدير عام كان من بطولة شادية وصلاح ذو الفقار ونجح الفيلم وكان عادل إمام جزء من أفلام شادية وصلاح ذو الفقار بعد كدا في فيلم كرامة زوجتي سنة 1967 وفيلم عفريت مراتي سنة 1968 في سنة 1969 بدأ عادل يقدم ادوار كبيرة ويبقي البطل التاني أو البطل المشترك صديق البطل الاول وكانت البداية بفيلم لصوص لكن ظرفاء اللي كان عادل إمام فيه بطل مشترك مع أحمد مظهر نجح جدا في وقتها وبعدين فيلم فتاة الاستعراض ونص ساعة جواز لغاية سنة 1972 قدم عادل إمام أول فيلم من بطولته المطلقة “فيلم البحث عن فضيحة”واتعرض الفيلم في بداية سنة 1973 وحقق الفيلم نجاح كبير في وقت عرضه لكن مش زي نجاح أفلام محمود ياسين ونور الشريف وحسين فهمي في الوقت دا وبدأ عادل إمام يقدم أدوار بطولته مع أدوار بطولة مشتركة وفي نفس السنة قدم عادل إمام مسرحية مدرسة المشاغبين اللي كانت انقلاب في المسرح العربي وحققت نجاحا كبير وطلع من بعدها سعيد صالح ويونس شلبي وهادي الجيار وأحمد زكي معروفين بعد نجاح مسرحية مدرسة المشاغبين في سنة 1975 قدم عادل إمام مسرحية “قصة الحب الغربي “مع أبطال المشاغبين بالإضافة لحسن يوسف وصلاح السعدني ولبلبة وسيد زيان ولكنها لم تصور كي تعرض على شاشة التلفزيون، وكمان واتوقف عرضه لأسباب سياسية لأن المسرحية كانت بتناقش سياسة الانفتاح في عهد السادات بشكل فيه سخرية شوية بعد كدا في سنة 1976 قدم عادل إمام مسرحية منفردة بدون فرقة مدرسة المشاغبين وهي مسرحية”شاهد ما شفش حاجة “وقدر الزعيم عادل إمام يثبت نجاحه بعيد عن فرقة المشاغبين بعد كدا سنة 1978 قدم عادل مسلسل أحلام الفتي الطائر وحقق المسلسل دا نجاح جماهيري جبار شخصية ابراهيم الطاير كانت حديث الشارع والناس دخل عليها العيد وهي زعلانة علي موت ابراهيم الطاير في المسلسل وفي نفس السنة وبالتحديد في شهر نوفمبر قدم عادل إمام فيلم “المحفظة معايا” اللي كان نازل قدام فيلم سعاد حسني الجديد”شفيقة ومتولي”وفيلم سعاد حسني معروف أنه بيحقق أكبر إيراد لكن اللي حصل أن فيلم شفيقة ومتولي منجحش وفيلم المحفظة معايا كسر الدنيا وفي يناير سنة 1979 نزل فيلم رجب فوق صفيح ساخن وحقق اكبر إيراد في تاريخ السينما المصرية وكان أول فيلم يتخطى حاجز المليون جنيه ومن الوقت دا وعادل إمام صعد على قمة شباك التذاكر وأصبح الممثل الأعلى أجر في أكتوبر سنة 1979 اتعرض لعادل إمام فيلمين “خلي بالك من جيرانك”اللي نجح جدا واتعرض في السينما أكتر من سنة وكان بداية ثنائية عادل إمام مع لبلبة وفيلم” احنا بتوع الاتوبيس” اللي كان مفاجأة الجمهور دخل الفيلم دا بدل ما يخرج بيضحك خرج بيبكي وكانت بداية استعراض عادل إمام لعضلاته في الدراما وأنه مش مجرد ممثل كوميدي فقط بعد كدا قدم عادل إمام في سنة 1980 مسلسل”دموع في عيون وقحة”اللي حقق نجاحا كبيرا جدا وكان مسلسل الشارع زي مسلسل أحلام الفتي الطائر بعد كدا سنة 1981 قدم عادل إمام فيلم” المشبوه “مع سعاد حسني والفيلم دا يعتبر من أحسن أفلام عادل إمام في كل حاجة تمثيل وموسيقي وإخراج وتصوير وكل حاجة وكان بداية تقديم عادل إمام لأفلام الاكشن بالرغم أن المخرج سمير سيف روي أنه مكنش مقتنع بعادل إمام في دور ماهر النمر وكان عايز نور الشريف اللي يقدم الدور لكن عادل إمام عرف يقدم الدور بكل جدارة وفي نفس السنة قدم واحد من أفضل أفلامه “الإنسان يعيش مرة واحدة” وكان بداية ثنائية كونها عادل إمام مع يسرا وفي فبراير سنة 1983 نزل لعادل إمام فيلمه التاني مع سعاد حسني”حب في الزنزانة”وعادل إمام بيقدم فيلم رومانسي وقدر عادل إمام يكون جبار في الفيلم دا ويقدم واحد من أفضل الأفلام الرومانسية في تاريخ السينما العربية بعد كدا بدأ عادل إمام يتحارب شوية في أغسطس نفس السنة قدم عادل إمام فيلم خمسة باب مع نادية الجندي وحصل عادل إمام من المنتج محمد مختار علي ضعف أجره كشرط ليكتب اسم نادية الجندي متداخل مع اسمه بتتر مقدمة الفيلم واتمنع عرض الفيلم في وقتها بحجة أن الفيلم مخل مع أن الفيلم اتوافق عليه من الرقابة وعلشان ميبقاش عادل إمام هو المقصود اتمنع معاه فيلم كان نازل من أكتر من شهر اسمه “درب الهوى”وفي سبتمبر قدم عادل إمام فيلم “الغول”اللي كان دخل صور مشاهد منه نور الشريف لكن بعد خلاف علي ترتيب الأسماء ترك الفيلم وقدمه عادل إمام ويعتبر من أحلي الافلام اللي قدمها عادل إمام في نوفمبر نفس السنة قدم عادل إمام فيلم كوميدي خفيف اسمه “المتسول” وفيلم “الافوكاتو” اللي بعد عرضه حصل مشكلة كبيرة واتقدم 150 محامي بشكوي ضد عادل إمام بيتهموه فيه بإهانة المحامي وحصل مشكلة كبيرة في وقتها بين عادل إمام والمستشار وكان عادل إمام حيدخل السجن بعد كدا الموضوع اتحل وقدر عادل إمام يحقق إيرادات ضخمة في تاريخ السينما المصرية في 6 أغسطس سنة 1984 اتعرض لعادل إمام”فيلم الحريف”وكان أول فيلم في مسيرة عادل إمام ميحققش نجاح جماهير وقتها كان بيتعرض فيلم “النمر الأسود”للامبراطور أحمد زكي وكان مكسر الدنيا وفي نفس الشهر يوم 26 أغسطس سنة 1984 اتعرض فيلم “الهلفوت” وقدر عادل إمام يحقق أكبر إيراد في تاريخ السينما المصرية ويعوض خسارته في فيلم الحريف وفي نفس السنة قدم عادل إمام فيلم “حتي لا يطير الدخان” واحد من أفضل أفلام عادل إمام الدرامية وفي يوليو سنة 1985 اتعرض لعادل إمام مسرحية “الواد سيد الشغال” واللي حققت نجاح كبير وظلت تعرض 8 سنين من سنة 1985 الي سنة 1993 علي خشبة المسرح وفي نفس السنة قدم عادل إمام فيلم الإنس والجن وكان مقدم شخصية غريبة عليه شخصية عفريت وبالرغم من كدا قدر عادل إمام يقدم الشخصية بنجاح كبير وحقق أيرادات كبيرة في سنة 1986 قدم عادل إمام فيلم جميل جدا”كراكون في الشارع” بيناقش قضية أزمة السكن وفي سنة 1987 قدم عادل إمام فيلم “النمر والانثي” ويعتبر برده من أقوى أفلام عادل إمام وقدم فيلم “سلام يا صاحبي” واللي كان مقدم فيه ثنائي رائع مع سعيد صالح ويعتبر من أحلي أفلام عادل إمام وفي سنة 1988 كان بيستعد عادل إمام بعد نجاح شخصية جمعة الشوان أنه يقدم شخصية “رأفت الهجان “لكن الدور راح لمحمود عبد العزيز وحصل خلاف بين عادل إمام ومحمود عبد العزيز استمر لفترة كبيرة في نفس السنة كان في مجموعة شباب بيقدموا عرض مسرحي في أسيوط هاجموهم الجماعات المتطرفة وحاولوا منعهم من تقديم عرضهم المسرحي بالقوة وردعهم باستخدام الجنازير والسنج فسقط ومات ٢ وأصيب آخرون قرر الزعيم عادل إمام في موقف شجاع تقديم عرضه المسرحي في اسيوط وسط تضامن ودعم وحماس من جموع المثقفين والمبدعين وفي سنة 1989 قدم عادل إمام فيلم “المولد”وفي سنة 1990 قدم عادل إمام فيلم “حنفي الابهة” وفيلم “جزيرة الشيطان”اللي كان بيتم تصويره تحت الماء كتجربة جديدة علي السينما المصرية سبق وتقديمه في فيلم “جحيم تحت الماء”لكن فيلم جزيرة الشيطان كان بميزانية أكبر وفي سنة 1991 قدم عادل إمام”فيلم شمس الزناتي”اللي متاخد من فيلم العظماء السبعة وفي نفس السنة قدم عادل إمام بداية ثلاثية مع المخرج شريف عرفة والمؤلف وحيد حامد قدم خلالها أهم أفلام في فترة التسعينات 5 أفلام من عام 1991 الي عام 1996 (اللعب مع الكبار-الارهاب والكباب -المنسي-طيور الظلام -النوم في العسل)وبين الفترة دي قدم عادل إمام مسرحية “الزعيم” عام 1993 اللي حققت نجاح كبير جدا وفضلت تتعرض 6 سنين وحصل منها عادل إمام علي لقبه وفي سنة 1994 قدم عادل إمام فيلم”الإرهابي” وأثناء تصوير الفيلم اتلقي عادل إمام من الجماعات الإرهابية تهديدات بالقتل وكان الزعيم على رأس قائمة الاغتيالات، لكنه أصر على إكمال الفيلم خاصة بعد واقعة قتل الطفلة شيماء في مدرستها أثناء محاولة اغتيال رئيس وزراء مصر وقتها الدكتور عاطف صدقي.وقدم عادل إمام سنة 1995 فيلم”بخيت وعديلة”واللي قدر يحقق إيرادات كبيرة جدا وقدم عادل إمام جزئين من الفيلم بعنوان “الجردل والكنكة”و”هاللو امريكا”في سنة 1998 اتعرض فيلم “رسالة الي الوالي “وكان تاني فيلم يفشل جماهيريا في مسيرة عادل إمام وفي نفس السنة اتعرض فيلم “صعيدي في الجامعة الأمريكية” وحقق اكبر إيراد في تاريخ السينما المصرية وكتبت الصحافة وقتها “هنيدي ينهي سطوة جيل عادل إمام”وفعلا كل النجوم والنجمات وقتها (نور الشريف-محمود عبد العزيز-محمود حميدة -فاروق الفيشاوي -نادية الجندي-نبيلة عبيد )كانت نجوميتهم كنجوم شباك تذاكر انتهت واتجهوا للدراما التليفزيونية ماعدا ٢ قدروا ينافسوا الشباب عادل إمام وأحمد زكي وفي سنة 1999 اتعرضت مسرحية”بودي جارد”اللي هي أضعف مسرحية لعادل إمام لكن كانت محققة نجاح جماهيري وفضلت تتعرض 11 سنة وفي سنة 2000 شغل عادل إمام منصب سفير النوايا الحسنة وفي صيف 2002 وبعد غياب سنتين ونص رجع عادل إمام بفيلم “أمير الظلام”وقدر عادل إمام ينافس الشباب ويحقق إيرادات كبيرة وفي صيف 2003 بدأ عادل إمام يقدم دور الأب في فيلم “التجربة الدنماركية”وحقق نجاح كبير جدا وكان بيتنافس علي المركز الاول مع محمد سعد واستمر يقدم أفلام كوميدية في 2004 قدم فيلم “عريس من جهة أمنية” وفي 2005 قدم فيلم “السفارة في العمارة “وكان بينافس محمد سعد علي المركز الاول وفي صيف سنة 2006 و2007و2008 قدر عادل إمام يحقق أكبر إيراد علي السنة بأفلام (عمارة يعقوبيان-مرجان احمد مرجان-حسن ومرقص) وفي سنة 2009 اتعرض لعادل إمام فيلم “بوبوس “واللي برغم من تحقيقه أيرادات كويسة لكن مكنتش بنفس مقدار نجاحات الزعيم السابقة بعد كدا قدم عادل إمام في عيد الاضحى سنة 2010 فيلم “زهايمر”وقدر يحقق من خلاله أكبر إيراد خلال موسم عيد الأضحى في 2011 كان بيستعد عادل إمام لفيلم “فرقة ناجي عطا الله”لكن لضخامة ميزانية الفيلم اتكرر تحويله لمسلسل تلفزيوني اتعرض في رمضان سنة 2012 وكانت عودة قوية للزعيم عادل إمام بعد غياب 32 سنة عن الدراما وحقق المسلسل المركز الاول في نسبة المشاهدة بعدين اتعرض مسلسل”العراف”في رمضان 2013 وحقق أيضاً المركز الاول في نسبة المشاهدة من سنة 2014 لسنة 2018 قدم عادل إمام خمس مسلسلات “صاحب السعادة-أستاذ ورئيس قسم -مأمون وشركاة -عفاريت عدلي علام-عوالم خفية”وقدر عادل ينافس من خلالهم علي أول 5 مراكز في نسبة المشاهدة وفي سنة 2020 اتعرض مسلسل”فالنتينو” اللي محققش نفس نجاح مسلسلات الزعيم عادل إمام تتفق أو تختلف مع عادل إمام لكن عادل إمام يعتبر صاحب أهم مسيرة لفنان في تاريخ الوطن العربي أن واحد يطلع يعمل كام عمل ويأخد شهرة كام يوم دا طبيعي لكن اللي مش طبيعي أن ممثل يقدر يفضل ناجح في السينما والمسرح والتلفزيون ومستمر في الصدارة علي مدي ستين سنة تحية كبيرة للزعيم عادل إمام