إخلعيني وارحميني من النكد ومن العذاب
إخلعينى وريحيني من المشاكل والسباب
إخلعيني أتنازلك ع السرير ويا الدولاب
دانتي خليتي حياتي حرب قايمة وإنقلاب
سايبه العيال عملالى دوشه وزلزله وضرب وصريخ
والهدوم سيباها وسخة والحلل فيها الطبيخ
والصحون في الحوض ريحتها معطرة رنجة وفسيخ
لمت الفيران في بيتي والقطط ويا الكلاب
إخلعيني بالهداوه مستحيل أنا أعيش معاكي
صدقيني يوم مايحصل لكسر القله وراكي
وأنسى أسمك وأنسي سيرتك وارتاح شوية من ازاكي
وأندم على سنيني اللي ضاعت وياكي ياوش الخراب
الجيران يشكو لي منك الحريم ويا الرجال
اللي عزل من عمايلك واللي هج بدون عزال
واللي قاللى ياعم طلق و لادي في نظرك غزال
قلت العصمة يا ناس في إيديها خسارة يا صحاب الشناب
إخلعينى أبوس إيديكي نفسي أعيش زي الخلايق
نفسي أبعد عن مشاكلك والقى نفسي سعيد وفايق
نفسي أفرح وأنسي حزني وألقي بالى شوية رايق
دا اللي ياخدك بعد مني له ألف جنه بدون حساب
رؤوف علواني
