من ورا إزاز الصورة
بتشاورىلى
بتبصى
جوَّا حبابى عنيه
اسمع صوتك
وسط سكوتك
بيدفي ف حيطان البيت
عامل ايه؟
لساك بتخاف م الضلمه
ومعلق روحك ف اللمبه
وبتحلم
إن نجوم السما عفاريت
ليه يا ضنايا ؟
مش حفضتك آية الكرسي
…. وللَّا نسيت
صليت يا واد
وللّا لسه ح تتوضا
طيف العِشا داخل
والميه من فضه
خش ف الصلا
ح تلاقى الفاتحة
واقفالك
تفتح وريد الدعا
ف السما شبابيك
تنزل الرحمه مطر
يدق على بابك
يزرع غناوى الرضا
جوَّا حبابي عنيك
يا ابن بطنى
يا نبضه
متشاله ليوم اللُقا
ونس الليالي تسابيح
افتح بيبان الشرنقه
الدنيا ايه …
دا مهما طالت ضيقه
انقش لون السما ف عنيك
واتحنِّا بنجومها
وطير بين الشجر
واتغطى بنسيمها
واملا جيوبك غُنا
تتعفرت الاحزان
تركب حصان خوفك
ترمح بقلب جبان
اهنزت الصورة
الصوت اختفي
بس الدفا
لساه سهران على خدى
آه يا أمى
يا فرش السما والبيت
يا كلمة حروفها بتندِي
يا أحلى حدوته ف الحواديت
واحشنى ف حجرك التنطيط
والسبحه اللي فيها شريط
والسجده ع السجاده
والطرحه
اللي بلون قلبك
بيضه بزياده
مع السلامه
يا أمي
الله يرحمها يا ساده
كلمات الشاعر الكبير سليمان خطاب
