مستعجل ليه يارؤوف؟!
أعزي مين يارؤوف في موتك المفاجيء
أعزي نفسي جداً ياأشرف المبادئ
ياأطهر الملايكة ياأعظم الحقايق
صوتي من يوم فراقك بقى زي دمي حادق
ياريت الموت ياصاحبي كان يبقي بيا بادئ
علي الأقل اسيبك إنسان في الدنيا صادق
يعطف علي كل عايز يطفي كل الحرايق
عالجت قلبي لما كان غيرك ليا شانق
مستعجل ليه يارؤوف صممت ليه تفارق
ده الدنيا لسه غامقه مليانة بالمضايق
فيها كلاب دنيئة عاشقة كل المساوئ
قدمت وردة ليا غيرك قدم مشانق
مش طايق لحظة بعدك ولا حتي قلبي طايق
ما عادتش الدنيا حلوة ولا عاد الجو رايق
ياهمسة المغارب ياشمسة المشارق
سايق عليك نبينا تقابلنا في المفارق
تدينا بسمة حلوة وتجيب لينا البيارق
أولادي بيبكوا لسة ياحاميهم من الشرانق
الموت ماكانش لايق عليك وعليا لايق
يارؤوف ياحبيبي مخي مزروع مطارق
ياريت موتك يارؤوف كان يبقي ظرف طارئ
بعدين ترجع للأهلك تزرع في الروح حدايق
حسيت بالموت كإني كان لية بس سارق
أنا بيتي بعد موتك أصبح ذي الخنادق
الموج هايعلى بعدك وأجيب منين زوارق
الشمس بعد موتك حامية والبدر حارق
أنا كنت بيك معزز ومكرم كنت سابق
دلوقتي يا صاحبي شايف زهر الحياة بنادق
هافضل مجروح يارؤوف مدبوح والرب بارئ
مش ممكن حد غيرك يحميني من الطوارئ
أمير الأحزان ( رؤوف علواني)
