كتب..عاطف أنيس
مشكله بنعاني منها بقالنا قرون ومش لاقيين ليها حل… رئيس ورا التاني تولي حكم البلاد مقدرش ينضف المحليات
لو كنت معتقد إن الرئيس السيسي ممكن يحل المشكله ده في سنتين تلاته تبقي غلطان لإن الموضوع ده متشعب بطريقه كبيره جدا بداية من رئيس الحي لأحدث موظف وعشان تتحل هتاخد وقت أكيد وكمان محتاجه حرفيه عاليه عشان تقلع الفساد من جذوره،
أي كارثه من مباني مخالفه لعدم تجديد طرق في الأرياف لقرارات إزاله مركونه في الدرج للإستيلاء علي أراضي ملك الدوله كلها بتتم بعلم الحي التابع ليها
أي مجلس محلي في أي قريه بيروح للشغل ربع الموظفين والباقي بيشتغل شغلانه تانيه والأمور بتمشي بالحب بينهم وبين بعض وأخر الشهر الكل بيقبض مفيش خصم يوم
أي رئيس حي بتكون عينه علي الوظيفه مرتب كبير وعربيه المفروض توديه الشغل هو بياخدها يروح بيها الأفراح والعزومات وشغله في الحي أخر حاجه يفكر فيها وبرضه بيقبض أخر الشهر مرتب وعلاوات ومكافأت معرفش مكافأت علي إيه بالضبط دى غير الدخل التاني اللي أضعاف مرتبه
أغلب المجالس في الريف بيكون أغلب الموظفين فيها قرايب رئيس حي سابق وكل واحد بيحاول يوظف أكتر نسبه من أهله ونسايبه لذلك أكتر مليارات بتضيع علي الدوله بتكون بسبب رئيس حي مرتشي معاه شوية موظفين أغلبهم إخوان
طبعا مش هينفع نوظف ورا كل موظف واحد يراقبه
يامولانا ده لو راح الشغل بيقضيها شاي وحكاوى وبيتوضي للضهر الساعه عشره وبيخرج من المصليه من الباب الخلفي علي البيت وهو ماسك السبحه وفاكر نفسه أدى فريضه
الحل مع الأشكال دى هو القانون
القانون هو إللي بسببه الغرب بيشتغل وبينتج ومش بيبلطج
علي فكره الغرب معندوش ضمير زى ماحضرتك فاهم ولا مقطع حصر الجامع من التقوى .
لكن عنده قانون مفيش فيه رحمه لكل مرتشي أو حرامي وبيطبق علي الكل
يعني إحنا عشان نستمر في تنضيف بلدنا من الأشكال دى محتاجين نعدل تشريعات فيه مواد في القانون المرتشي أو الحرامي حافظها أكتر من أي محامي وعارف عقوبة الرشوه أو السرقه بتكون أد إيه لو جاب محامي شاطر لذلك بيسرق ويبلطج وهو عارف إيه الحكم إللي هياخده في النهايه
وإللي بيكون مش علي قدر الجرم إللي إرتكبه
ولو سألتني عن رأيي في المرتشي أو الحرامي هقولك خطورته لاتقل عن خطورة الإرهابي الإتنين معندهمش شرف ولادين والإتنين بيقضو علي الشعب
بلاش الغرب عشان ممكن قوانينهم تكون صعبه علينا… عندك دوله زى الإمارات فيها قانون صارم بينفذ علي أي حد في البلد ومفيش واحد بيفلت من العقوبه مهما حاول
إنما إللي بيحصل ده بصراحه معجنه والرئيس السيسي مش هيحارب الفساد لوحده ولا الرقابه الإداريه هتقدر تنضف مصر من السرطان ده إلا بقانون جديد
أقسم بالله فيه قري ريفيه ونجوع إلي الأن أغلب سكانها بيسرقو في الكهربا والموظف عارفهم بالإسم ورغم ذلك مطنش لانه بيقبض منهم
بقالين بيسرقو الغلابه في التموين سواءا كانت سرقة سلع أو فلوس زياده والماكينه معطلها عن عمد عشان ميتكشفش وأقل شهر بيسرق لايقل عن عشرة ألاف جنيه غير مكسبه الأساسي
وغير كده كتير وكتير لإن الفاسد مش هيتوب أبدا إلا لو قطعت إيده بالقانون
ولو صعب نعمل قانون جديد يبقي لازم طريقه تانيه نفكر فيها… لان اللي بيحصل بصراحه إننا بنقبض علي فاسد بيطلع مكانه عشره
علي فكره مصر مش فقيرة فلوس ولا حاجه
شوف بقالها كام سنه بتتسرق ولسه موجوده
الفقر الحقيقي إللي بنعاني منه هو فقر الضمير
اللهم احفظ مصر
