بقلم : دامال ابراهيم
عزيزي الرجل قبل الذهاب للمآذون
حاجات لازم تعملها قبل ماتفكر في الطلاق راجع نفسك …قبل ما تخسر وأولادك تخسر
1- متبطلش تعاكسها، متبطلش تقولها كلمة حلوة، متبطلش تخرّجها، متفتكرش انك ملكتها بمجرد جوازك منها ! متبطلش كلامك الحلو، هو مش حصري للخطوبة والصحوبية بس !
2- أحمي قلبك، متكبرش، متعقلش، متقولش لأ هبطل اعمل كذا اصلي اتجوزت، هي مأجربتكش انك تكبر ! انت اللي بتمنع نفسك من الحياة ، مترميش مشكلتك على شريكة حياتك !
3- أقع في حبها مرة، وكمان مرة ، وكمان مرة متقولش خلاص حبينا بعض وعرفت عنها كل حاجة يلا نتجوز ! أعرفها اكتر، ادخل في تفاصيلها الحلوة وحبها، وتفاصيلها الوحشة وتقبلها ، اختارها في كل مرة عقلك الذكوري يقارن بينها وبين شخصية في احلامك، لان هي الواقع
4- شوف الحلو وحبه، بيّن انك بتحبه، قول انك بتحبه او بمعنى آخر “قدّرها”
5- مش شغلانتك ولا مطلوب منك انك تغيرها “للأحسن” او اللي انت شايفة احسن، ماهو هتاحبها زي ما هي وتاخدها وتتجوزها وتغيرها فمتحبهاش فتطلقها فتسيبها فتدمرها وتقنع نفسك انك مجني عليك !!!! افهمها ازاي دي ؟!
6- اتحمل مسئولية، اتحمل مسئوليه عشان انت مش متجوز امك، امك بتحبك حب غريزي فبتعمل المستحيل عشان تشوفك مبسوط، مراتك مش امك مش مسئوليتها لوحدها انها تخلي البيت وسيادتك سعداء !!
7- عصبيتك مشكلتك، انشف واتحملها ومتطلعهاش عليها !
8- حكمة متعلمتهاش الا متأخر Let it be ، لما مراتك تضايق، تتخنق، يحصل مشكلة وتتكلم معاك عليها Let her be يعني اديها مساحتها تتكلم وتشتكي وتعيط ومتطلعش السلاح وتقرر تحل كل المشاكل، هي مش صغيرة، هي لو عاوزة تحل هتحل ! هي عاوزاك تسمعها
9- أضحك، بيقولوا سر سعادة البيت في الست ؟ لأ سر سعادة البيت في حجم الابتسامة اللي على مش شريكة حياتك ودي بتقيس مدى رجولتك في بيتك. فأضحك !
10- اتعلم لغة حبها ليك، يعني مثلا بتحب اسم دلع معين كرروا ليها، بتحب الأكل ، بتحب الورد، بتحب الplay station ؟ شوف بتحب ايه، اعمل مجهود انك تعرفها
11- خليك موجود، أصحابك هيتجوزوا وقاعدة القهوة كل يوم هتبقى مرة في الشهر، هي اللي باقية وموجودة !
12- متبقاش مش واقعي، المشاكل بينكم هتحصل هتحصل ولا هي نكدية وزنانة ولا انت صح والحق معاك ! اما تحصل مشكلة بتسبهاش تتراكم حاول تفصل بين مشاعرك وبين السلوك اللي زعلك…
13- اديها مساحة تتنفس، تخرج مع أصحابها، متحولهاش لكائن بيتوتي لو هي بتحب الخروج ولا تجبرها تعزم اصحابك كل يومين في بيتها لو هي مش بتحب لمة الناس الكتيرة، خليها تتنفس
14- مش هيحصل حاجة لو عيطت في حضنها، متقلقش مش هتذلك عليها في أول خناقة بينكم زي ما انت بتعمل، هي هتحترم لحظات ضعفك اللي انت مش بتحترمها
15- لاتعطي الفلوس. أهمية كبيرة . اتجوز بالمبدأ ده وحياتك هتبقى رائعة لو عينها مليانة، اصرف فلوس عليها وعليك، استمتع بالوقت والخروج علي اد ماتقدر
16- سامح.. متشيلش، سامح عشان انت ليك غلطة هتتمسك عليك في يوم من الايام وهي احتراما لمسامحتك ليها هتسامحك وتمشي المركب “ده لو انت راجل سوي”
17- الحياة مش جنس بس، تأكدوا ان العشرة والحب بتخليكم تقبلوا بعض والكلام عن الجنس بينكم وبين بعض مش عيب، بالعكس ده مطلوب وبشدة !
18- احضنها، بوس راسها، ومتحسسهاش ان اي حاجة بتطلع منها تافهه او قليلة.. 3 قوانين احفظهم زي أسمك !
19- دايما اختار الحب.. مش رومانسية فارغة بس الحب هو اللي بيمشي المركب في الحياة البائسة دي، لا كرامتك ولا غرورك ولااحساسك انك دايما صح.. كل دي حاجات بتهدم.. إلا الحب !
20- كل اللي حواليك بيشتكوا من الجواز، اه دي حقيقة وانت بتعمل زيهم بس ولا واحد فيكم هيقدر ولا هيتجرأ على الطلاق وببساطة لاننا جميعا انصاف حياة من غير نصنا التاني !
ناس كتير ندمت بس بعد فوات الاوان….. مكنش في حد ينصحها كانت تتمنى حد يقولها كدة قبل ما تخسر حب حياتيها، وحاجات حلوة صعب تتعوص ياريت تفكروا الف مرة قبل اتخاذ القرار الصعب دة.اللي بتبقي فاكر انك نهيت المشكله والحقيقه انك بتمشي او خطوة في طريق المشكلات…. والوقت والمجهود اللي تبدوا بيه في قصة جديدة لو عملته في حياتك احسن كتير… .
