كتب…عاطف انيس
– الاهلي ابتدى المباراة بتشكيل من الاسماء اللي كان المفروض يقدموا مردود فني اعلى من اللي اتقدم منهم .
– المحلة لعب ماتش دفاعي على اعلى مستوى من الناحية التكتيكية و البدنية و ساعدهم في ده حالة الارهاق البدني و الذهني الواضحة علي لاعيبة الاهلي .
– موسيماني فشل تماما في ايجاد اي حلول لاختراق دفاعات المحلة المحصنة بتوجيهات المخضرم خالد عيد و مخزون بدني كبير للاعيبته.
– الاهلي بقى عنده مشكلة فنية في التعامل مع الفرق الصغيرة اللي بتدافع و النهاردة وصل لاسوء مستوى فيها انه ما ينجحش في تشكيل خطورة بتكتيك فني غير عن طريق الكور الثابتة و ده شئ غير مقبول بالمرة لفريق بشخصية الاهلي .
– لازم الجهاز الفني يلاقي حل مع اللعيبة في موضوع انك جالك الفرصة في اكتر من ماتش انك تكون متقدم ٢/٠ في اول ربع ساعة و ما بتستغلش الفرصة دي و ده كفيل يغير سيناريوهات ماتشات كتير فاتت منهم ماتش النهاردة .
– مش قادر اتخيل غياب ديانج لاي سبب لاقدر الله لان اعتقد ان لو الوضع حاليا سئ ففي حالة غيابه هيكون كارثي .
– في ازمة ثقة غير مبررة عند اكتر من لاعب و لاعبين كبار كمان … من غير ذكر اسماء .
– وليد سليمان ما نجحش انه يصنع الفارق حتى الان مع الاهلي من ساعة ما رجع من الاصابة و انت عارف كدا و ده سبب عصبيتك الزيادة .. الفريق في اشد الاحتياج للحاوي يا وليد.
– لو انا صاحب قرار و عارف ان محمود وحيد هيلعب شوط واحد بس هبتدي بيه الاول و العب ببيكهام الشوط التاني .
– عيب قوي اللي اتعمل في حائط الصد بتاع الاهلي في كورة فاول الهدف الاول للمحلة.
– انا حاسس و يا رب احساسي يطلع غلط ان محمد شريف ابتدى يتابع السوشيال ميديا .
– مش قادر الوم على اللي جاب بواليا الاهلي لانك جايبه بيطلع نار من بوقه و مش ماتش و لا ماتشين ده موسم و نصف بيقدم نفس المستوى.
– مش فاهم ايه المتعة في اني العب كورة على ارضية ملعب فيه عيوب واضحة و انا عارفها و اقدر اغيرها بس ما بعملش كدا لمجرد ان يكون ليا الافضلية على الخصوم عشان متعود عليها.
– كان لازم الحكم يحمي لاعيبة الاهلي ضد خشونة لاعيبة المحلة بانه يدي انذارين او ثلاثة على الاقل من ٥او ٦ لعبات في اول ٢٠ دقيقة .
في النهاية اعتقد ان الاهلي عمل رقم سلبي و هو الفشل في استغلال اخفاقات المنافس كعدد مرات في نفس الموسم .. صفحة و اتقفلت و بكرة الصبح هنفتح صفحة الماتش الجاي و محتاجين رجولة و تركيز اكتر يا رجالة عشان وقت الحساب مش هنعمل حساب لاي اسم غير اسم للكيان 🦅
