كتب…عاطف انيس
إنك تلعب فى مركز غير مركزك الأساسى فى مباريتين قبل نهائى إفريقيا وضد مين ضد الترجى فريق متمرس وقوى واخر ٤ سنين واخد دورى أبطال إفريقيا مرتين يبقى لازم نقول 
فريق عنده لعيبه خبرات ولعيبه دوليه وكسب الزمالك رايح جاى وتلعب على أتقل وأمهر لاعب عندهم ( حمدو الهونى ) وتحطه فى جيبك فى قلب بلده وقدام جمهور كان ناقص ينزل يولع فى الملعب وكأنك بتقول ليهم يا منطقه مفكيش راجل ولو فيكى راجل يجيلى يبقى لازم نقول وفى ماتش العوده تفضل حطه فى جيبك ويجيلك تانى افضل لاعب عندهم ( أنيس البدرى ) وتحطه فى جيبك التانى وتعمل خط وتقول اللى هيعدى الخط ده هيموت يبقى لازم نقول ندخل بقى على مباريات مضغوطه ومؤجلات مطالبين بالفوز بيهوا ونبدأها بماتش بيراميدز وييجى أكرم أبو الرجوله ويلعب على( رمضان طموح ) ويحطه فى جيبه ويضطر رمضان يغير مكانه ويلعب شويه فى القلب وشويه ناحية معلول عشان يهرب من رقابه أكرم و يخرج من جيبه شويه يبقى لازم نقول وبعدها ندخل على مباراة سموحه واحنا فى قمه الضغط بسبب التعادل مع بيراميدز وبسبب قوة فريق سموحه اللى كسب الأهلى فى الدور الأول وييجى أكرم يستمر فى التألق ويلعب بردو على أمهر ثلاث لاعبين فى سموحه ( مصطفى فتحى و عبد الكبير الوادى وأحمد عبد القادر لما كان بيتطرف ناحيه أكرم ) ويحطهم بردو فى جيبه يبقى لازم نقول وبعدها ندخل على ماتش المقاولين ونقابل فريق متكتل فى منطقه جزاؤه ومش عارفين نخترق ولا نخلق فرص للتهديف وييجى هنا دور أكرم الهجومى ويقدم الحل ويعمل عرضيه متقنه يساهم بيها فى الهدف اللى فتح المباراة يبقى لازم نعمل أرقام أكرم فى ال ٥ مباريات أرقام مميزه
جدا كالأتى
مباراة الترجى( الذهاب) : لعب (٨٤ دقيقة) وكانت خطورة الترجى الوهمية من ناحية أكرم اللى لعب الكورة (٢٦) بشكل صحيح من أصل (٣٠) بدقه تمرير( ٨٠% )وعمل تمريرة حاسمه وعمل مخالفتين فقط وحصل على مخالفة . مباراة الترجى ( الإياب ) : لعب (٩٠ دقيقة) ولعب الكورة (٥٤) مره بشكل صحيح من أصل (٦٣) مرة بدقة تمرير وصلت( ٨٥.٧%) وطبعا هنلاحظ إن دقه التمرير ذادت وعمل كمان ( ٣ )تمريرات حاسمة ولم يرتكب أى مخالفه وحصل على مخالفه واحده . مباراة بيراميدز : لعب ( ٧٨ دقيقه ) ولعب الكرة (٢٢) مره بشكل صحيح من أصل ( ٢٤ ) مره بدقة تمرير وصلت( ٩٢%) وهنا هنلاحظ إن دقة التمرير ذات عن ما سبق وسدد على المرمى تسديدتين وحصل على ٣ مخالفات وارتكب مخالفتين . مباراة سموحة : لعب ( ٩٠ دقيقة ) ولعب الكورة (٥٠) مرة بشكل صحيح من أصل (٥٥ ) بدقه تمرير وصلت (٩١%) وعمل تمريرة حاسمة وسدد تسديده صحيحة ولعب ( ٣ ) كرات طوليه صحيحة مباراة المقاولون العرب : لعب ( ٩٠ دقيقة ) ولعب الكرة (٦٤) مره بشكل صحيح من أصل ( ٧٥ ) بدقه تمرير ( ٨٥.٣ %) وهنا دقه التمرير قلت نسبيا التكتلات الدفاعية وتضييق المساحات اللى كان عامله لاعبى المقاولون لكن كمان عمل( ٢ ) تمريرة حاسمه وحصل على ( ٤ ) مخالفات وسدد على المرمى تسديده وحيده وعمل (٧) كرات عرضية .
فنيا : الشئ اللى جاعل أكرم مميز دفاعيا غير إنه قوى بدنيا هو إن عينه دائما على الكورة وليس على جسم اللاعب .والشىء اللى جاعل أكرم مميز هجوميا هو جوده الكرات العرضية وكمان ميزة التصويب سواء باليمين أو بالشمال .
اللى قدمه أكرم فى ال ٥ مباريات والثبات فى المستوى اللى وضح طبعا من الأرقام والكفاءة والقتال والرجولة وتحمل الضغوط اللى وضحوا طبعا فى المباريات التقيلة اللى لعبها يخلينا نقول إن الأهلى وجد ضالته ليس فى مركز الباك اليمين فقط لا الأهلى وجد ضالته فى جوكر جديد . عذرا أحمد فتحى نحن فى حضرة ( التربو الجديد ) .أكرم توفيق تربو الأهلى
