كتب..عاطف انيس
موسيمان بدأ بـ 4-2-3-1 .. محمد الشناوي حارس، أكرم توفيق ظهير أيمن – بدر بانون و ياسر إبراهيم قلبين دفاع، أيمن أشرف ظهير أيسر، حمدي فتحي وأليو ديانج ارتكاز وسط الملعب، محمد مجدي أفشة صانع لعب وأحمد عبد القادر علي شماله وحسين الشحات علي يمينه، وبيرسي تاو مهاجم.
-واضح ان اندفاع سموحة كان لازم نستغله لأنه بيعمل مساحات في دفاعهم، وأول ما ده حصل تاو ابتدي يلعلع، لأننا قولنا من ماتش الإسماعيلي ان تاو عايز مساحة واتفرج على ابداع.
-احنا بين الشوطين قولنا ان أكرم توفيق بيعمل تدخلات عنيفة ومتهورة غير مبررة، وأخد انذار للسبب ده، موسيماني خاف عليه يتطرد وبدأ الشوط الثاني بالدفع بمحمد هاني بدل أكرم.
-الأهلي في الشوط الثاني أحسن بكتير لأنه ببساطة استغل مساحات الدفاع في سموحة.
-في الشوط الأول الأداء كان سيء رغم تقدمنا بهدفين، في الشوط الثاني اتحركنا أكتر وبالتالي عملت هجمات أكثر خطورة.
-الأهلي في الشوط التاني حاجة تاني، سموحة فتح اكتر واحنا اتحركنا صح واتحركنا كتير وده بيفرق معانا جدا.
-ثاني التغييرات نزول كريم فؤاد كظهير أيسر بدلا من أيمن أشرف، معرفش كريم هيعمل ايه في المركز ده وهو اعتاد اللعب ظهير أيمن، وهل هيتوظف في المكان ده؟ ولا هي ظروف مباراة وتجربة؟ والتغير الثالث نزول عمار مكان قفشة تغير مركز بمركز.
-الهاني سليمان لعب ضربة مرمي وكان في كرة في الملعب في الست ياردات عنده والحكم شاور باستمرار اللعب على أساس انه هيطلع الكرة بره يروح يرميها في اتجاه لعب الكرة، البنا ماوقفش اللعب لكنه بغرابة ماطلعش انذار للهاني!
-كلمة السر في اللاعبين المهاريين طول ما بتمتلك لاعبين عندهم مهارات هتعرف تعمل كل حاجة، عندك مجموعة عندهم مهارات تقدر في أي وقت تعمل فارق كبير.
-كالعادة يدخل فينا هدف مالوش مكان من الاعراب، ضغط بطيء جدا، كناريا مسك الكورة واتمطع وكان ناقص يشرب شاي لحد ما ابتدينا نضغط عليه!
-الفوز كبير وممتع لأن الأهداف حلوة جدا، الأداء تباين بين الشوطين، لكن المجمل تقدر تقول المستوي جيد مرتفع.
-فوز مهم قبل توقف الدوري وتربع بدون منازع على قمة الدوري، ما شاء الله.
