كتب / نور أحمد عوض
حلقة منى الشاذلى وهى مستضيفة ” احمد فتحى ” الفنان اللى معروف بخفة دمه ويمكن اغلبنا ميعرفش اسمه الحقيقى حتى لكن بيحب مشاهده فى الافلام .. وكان معاه فى الحلقة زوجته وهما معندهمش اطفال يعنى وملهمش غير بعض … وكانوا بيحكوا عن تفاصيل بسيطة فى علاقتهم مع بعض واللى بدات قبل ما احمد ينجح باى شكل فى مجال السينما وكان لسه بيحاول فى طريقه …
فمنى الشاذلى لما سالته اشمعنا هى … قال بصدق ويمكن من غير ما يفكر عشان كانت ” اصيلة ” .. فى ستات تانية لما تشوف اللى بتحبه بيقع تمشى وتسيبه لكن هى الوحيدة اللى انا كنت متاكد انه انا لو وقعت فى نص الطريق هتمد ايدها وتقومنى …
ولما منى الشاذلى سالتها اشمعنا هو .. قالت بايمان فى حبها له بانها مصدقة بان ربنا مقسم للناس زرقهم وانا كنت حساه ” رزقى ” … ومن كتر ماهو حنين وبيحاول يسعدنى حتى لو معرفش فكفاية انه بيحاول … ولما مجبناش عيال اتاكدت اكتر من ان ربنا بيقولى انه احمد بقى هو كله ” رزقى ” …
اللى اتاكدت منه وانا بسمعهم ومن طريقة كلامهم البسيطة والمليانة فى نفس الوقت بمشاعرهم الحقيقية بانه الراجل مافيش حاجة تطمن قلبه قد واحدة بتحبه فى وقت ضعفه وان البنت مافيش حاجة تطمن قلبها قد انها تشوف اللى بتحبه بيحاول عشان ضحكتها تدوم … وان الحب ما بين اتنين مش بيحتاج اكتر من الاحترام والثقة والصدق والمشاركة عشان يعيش … وان مهما كانت الظروف ومهما كانت الخبطات ومهما كانت الازمات الحب بيقدر و بيعدى بالصادقين فى مشاعرهم لبر الامان
