أنا مش زعلان انى ماشى
بس اللى واجعنى فراق أهلى وناسى
أمى وأصحابى وجيرانى
دول أغلى ماعندى بعد بلادى
بلادى بلادى بلادى
لكى حبى وفؤادى
لكى عمرى وروحى وحياتى
ماانتى أرضى وعرضى ورأس مالى
كبرت وأنا فخور بحالى
مرفوع الرأس أنا وخلانى
لوعيشت عمر على عمرى تانى
هفديكى برضه لان دينك على اكتافى
كان نفسى احميكى من الأعادى
بس رحلتى خلصت وجه ميعادى
مع السلامه يابلدى وسيبك أمانه
فى ايد ولادك أجدع رجاله
لايعرفوا خوف ولا إستهانه
هيفضلوا فى ضهرك وهيكونوا الحمايه
وهيرفعوا رآيتك لأعلى مكانه
وهيكملوا من بعدى ويأدوا الرسالة
لكن أمى لوحدها من غير رعايه
لاونيس ولاجليس ولاعنايه
على عينى ياعمرى سايبك تعبانه
بس كل مشوار وليه نهايه
كرمنى ربنا ومنحنى الشهاده
معقوله ياحبيبتى تكونى زعلانه
هونى يا أ مى شويه عليكى
ده قدرنا لا بإيديا ولا بإيديكى
أنا دايما هكون حواليكى
أشوفك واتونس بيكى
عارف إنى نور عينيكى
والروح اللى بتترد فيكى
كان نفسى أفضل تحت رجليكى
أخدمك ومحوجكيش لغيرى
بس ربنا كبير هيقويكى
وهيصبر قلبك لحد ماتجيلى
هكون هنا مستنيكى
ومعايا نبيي ونبيكى
وبصوته الحنون هيناديكى
يا أم الشهيد تعالى اسقيكى
هياخد بإيدك ويعديكى
ومن الحوض الشريف هيرويكى
انت وكل اللى زييكى
وتدخلى الجنه من الباب اللى يرضيكى
ودى مكافأه ربنا ليكى
علشان صبرتى واحتسبتينى
