يا أرق من نسمه الفجر
لما تصبّح ع الغيطان
يا ضحكة شمس
طارحة سنابل
ع العيدان
وغنوة طفلة
منقوشة
بكحك العيد
ونبضة حب مفروشة
فى قلب وريد
وضلة توتة
نعسانه في صوت
عصفور
ومدنه ترش وش الادان
ببخور
عاشق ريحة ترابك
ولبلابك
أبو الضفاير نور
يا حبيبتي
أنا المقهور
وأقول مستور
أبيع الهدمه
واتغندر بورقة توت
أبات مهدود
قليل الحيله متصبّر
بحلم يفوت
على صدره
كام نخله وكام ضله
وبيت خالي من العلة
تنزل من السما قُله
تبل ريق البيوت
حيطان صوتي مشروخة
والحزن مالِى الإوض
بطن الشجر حافي
نام الحمام م الدوخة
أنا مش طالب
عصا موسى
ولا سفينة نوح
نفسي أبطل نوح
وارسم فى كراسي
بيت للسما مفتوح
نجوم السما حُراسِي
يا حبيبتي
يا ساكنة احساسي
أنا مستنى
زي حمام الدار
بس حبطل زُوم
يمكن ألاقِي
فى احلامي
شوية نوم
كلمات الشاعر الكبير سليمان خطاب
