الجرح رافض دمعتك
ولا عادش حابب يتخنق
بين دمعتين
ولا عادش طايق خلقتك
ولا كسرتك
ولا حتى حزن العين
خليك كده
جوَّا حلم آيل للسقوط
لا أنت مارد
ولا مسخوط
درويش وفارط سبحته
ف السكة ألف تابوت
غاوي تموت..
عشان البنت أم ضفايرتوت
والقلب السارح ف الملكوت
منحوت على بابه
كام درويش
ما تعدش
ما تقوليش
لسه ف حلمك
حبة ريش
اكسر ضهر الحزن وعيش
وازرع جوَّا سكوتك صوت
واوعى تفوت
ع البنت أم ضحكة
ماتسويش
واوعى أشوفك تانى
درويش
كلمات الشاعر الكبير سليمان خطاب
