بقلم : رؤوف علواني
كزهور الندى البرية وبهجة الربيع المسافر إلى خيال الشاشة الساحرة تطل ” ندى ” على عالم التجسيد وفن التقمص، الجمال ” هبة ” والفن ” موهبة “، وقد حملت الاثنين معا واقتحمت الفن ” الألماني ” باللهجة المصرية مع محمد رمضان فكانت الاطلالة الاولى لها وصك العلاقة بينها وبين الجماهير في السينما.
ثم قدمت ” الملحد ” بمنتهى ” الإيمان ” بفنها وموهبتها وواصلت الصعود ووقفت على ” باب الخلق ” حتى دخلت ” البنسيون ” فوجدت ” الفئران ” وال ” خفافيش ” فضحكت وقدمت مسرحية ” البقية في حماتي ” ثم أصبحت احدى عضوات فريق التألق في ” سلسال الدم ”
إنها الفنانة الشاملة ندى بهجت ونقدم معها هذا الحوار الشامل للجماهير : –
- لا تقل ثورات الربيع العربي ولكن قل ” ثورات الخراب العربي “
- الثورة قلة أدب ..!!
- ثورة 25 يناير رجعت مصر 7 آلاف سنة ورا ..!!
- لهذه الأسباب ليبيا وسوريا ثورتهم ” غلطة “
- عصر مبارك أفضل من أيام السيسي
- احنا عاملين زي الصراصير في الشارع
- يا داخلية لمي البلطجية
- ظاهرة التحرش والتكاتك أسوأ شيء في مصر !
- أول ما أسمع كلمة أكشن باتحول !!
- الغول خدني بالحضن في سلسال الدم
- البطولة حلم والحلم قادم
- القانون مايبقاش قانون إلا إذا تم تطبيقه على الجميع .
** إذا أردنا أن نقدم بطاقة تعارف لندى بهجت بجمهور القراء من المحيط إلى الخليج فماذا نقول في بطاقة التعارف ؟؟
أنا ندى بهجت إنسانة بسيطة جدا خريجة ليسانس حقوق واحترفت الفن لوجود موهبة منذ صغري بداخلي .
أول محطة لي كانت مع خالد جلال ثم المحطة الثانية عيون القلب ونهاية بسلسال الدم
** ما الذي لفت نظرك في دورك في مسلسل سلسال الدم لتقبلي على العمل في المسلسل ؟؟
الدور كان عاجبني جدا أول ما قراته والمسلسل ككل طبعا والدور كان مميز وصدق احساسي والناس كانت متبعاني جدا فيه لان المسلسل كله كان ناجح لأقصى درجة
** كيف كان لقائك الأول بغول التمثيل عبلة كامل ؟؟
بصراحة كنت مضطربة جدا وخايفة من حتة ” القبول ” أحسن ماتحصلش لكن الخوف تبدد من أول لقاء بالفنانة الكبيرة وبقينا أصحاب في دقائق وهي حبتني جدا والمشاهد اللي كانت بينا كانت جميلة جدا ورائعة
كيف استطعت تقمص الدور ولبست ملابس ” توحة ” ؟؟
والله الدور بالنسبة لي بيبقى هو الأستاذ وانا التلميذة وباقعد أذاكر في الشخصية من الورق وأحفظها ثم أتقمصها تماما لحبي لمعايشة أبعاد كل شخصية أقوم بأداء دورها وتجسيده على الشاشة وبالفعل أول ما أسمع كلمة أكشن باكون الشخصية اللي على الورق على طول كانها بقت من لحم ودم وبتتحرك .
وكيف كان رد فعل الناس على دور توحة ؟؟
الحمد لله نجاح لم أكن أتوقعه وحقق أكثر ما كنت أحلم وحظيت بقبول الناس ودي أهم حاجة وجواز المرور لأي فنان .
ما الفرق بين أي شخصية وتوحة في سلسال الدم ؟؟
لا انا كل دور باعمله باعمله عشان أسيب علامة فيه سواء كان توحة أو أي دور آخر لازم احفر علامة خاصة وإلا يبقى العمل أو الدور مالوش لازمة في حياتي .
بس قبل كده كانت أدوارك محصورة في البنت الارستقراطية الجميلة فهل جعلك دورك تخرجين من هذا الاطار ؟؟
اكيد دوري في سلسال الدم بالذات اعتمد على التمثيل وإتقان التمثيل فقط وليس أي شيء آخر واخرج طاقة كبيرة كانت كامنة بداخلي .
بعد الدور ده .. تفتكري فرض عليك اختياراتك القادمة بحيث بقت أصعب لتقديم مستوى أفضل إن لم يكن على نفس المستوى ؟
بالطبع فرض علي دوري في سلسال الدم صعوبة بالغة في اختيار أي عمل قادم لأن بالتاكيد هابقى عايزة إضافة أقوى منه ولذلك فالدور لازم يكون أفضل
إيه مفهوم الفن ورسالتك اللي عايزة تقدمها ندى بهجت ؟
نفسي أعمل حاجة حلوة وكل دور يبقى أدائي فيه مميز وأحوذ اعجاب المتلقي بفني وأدائي أهم حاجة عندي اقناع الناس بما أقوم به وليس مهما عندي مساحة الدور أو عدد المشاهد المهم الجودة والإجادة ونفسب اعمل حاجة ترجع الناس لأخلاقيات زمان .
هل اختلفت الاخلاقيات عن زمان وما السبب ؟
طبعا اختلفت من أول ما جت ثورة يناير وكل شيء سيء ظهر في المجتمع .
وما ذنب ثورة يناير هل هي التي جعلت المجتمع سيئا ؟
الاخلاقيات بقت ” زفت ” من ساعة ما طلعت الثورة دي أظهرت البلطجية والمتحرشين وبقى الشارع كله قلة ادب.
وهل الثورة مسئولة عن التدهور الاخلاقي ؟
الثورة أخرجت أسوأ ما فينا كسر الخوف اللي جوانا كان له مردود سيء علينا كسر كل تابوهات الاحترام وبقت الحياة مستحيلة مفيش واحدة عارفة تمشي في الشارع التحرش ملا الشوارع وقلة الادب أصبحت مسيطرة وحياتنا بقت جحيم
معنى كده انك لا تؤمنين بثورات الربيع العربي ؟؟
طبعا ودي مش ثورات الربيع العربي دي ثورات الخراب العربي فكل شيء سيء ظهر بعد كل الثورات دي
هل هي كانت مؤامرة بالفعل على الشعوب العربية ؟
مش عايزة كلام لما مصر الحضارة تظهر بالشكل ده والبلطجة تسود حياتنا يبقى الثورة اللي في مصر دي طلعت أسوا ما فينا وخلت بلد الحضارة سبع تلاف سنة ترجعنا الثورة سبع تلاف سنة ورا
هل أفقدت الثورة مصر الريادة العربية ؟
نعم الثورة جعلتنا نفقد كل شيء كنا نملكه من ريادة وحضارة ووجود قوي في المحيط العربي بقينا زينا زي أي دولة صغيرة بسبب الثورة دي
هل جعلتك الثورة تفقدين طموحك ؟؟
لأ طبعا لان انت لازم يبقى عندك امل ان الامور تبقى افضل رغم أي شيء والفنان بالذات أول من يحلم بالتغيير دائما والتطور للأفضل
كيف تخططين لنفسك وماذا تتمنين ؟
لا أخطط إلا أن اكون في التمثيل جيدة وبلاشك أمنى أن يكون هناك في يوم من الأيام مسلسل باسمى وفيلم يحمل بطولتي كأي فنان يحلم بالتطور والارتقاء .
عصر ما قبل الثورة هل كان أفضل من الآن ؟؟
كل حاجة قبل الثورة كانت أفضل من الآن ، الفن كان أحسن من دلوقتي ، التعليم كان أفضل من دلوقتي ، الشارع كان اجمل من دلوقتي ، كل حاجة كانت أحسن من الأيام دي
بس الشعوب بتعمل ثورة عشان تبقى أفضل ؟
طب وبقت أفضل بقى ؟ آدينا شايفين النتيجة قدام عينينا
دولة زي ليبيا كانت بتعمل ثورة ليه ده مستوى المعيشة فيها كان مرتفع جدا وبترول وهيصة ، وسوريا نفس الامر كانت دولة غنية ومبسوطة .. طب مصر ماشي كانت فيها مشاكل وفقر لكن دول يعملوا ثورة ليه ؟
الثورة حدثت لها مؤامرات بعد وقوعها وجعلتها دول الخارج ثورات مسلحة لتشيطن الثورات ما رأيك ؟
طب يبقى انت مش عارف تعمل ثورة كنت سكت بقى طالما مش عارف تعمل ثورة صح يا مواطن يا عربي كنت تقعد ساكت
ايه اللي بيدايقك في الشارع المصري ؟
يوووه حاجات كثير .. ظاهرة التحرش اللي مالية الشارع المصري ، التكاتك اللي غزت الشارع المصري وبقت البلد زحمة واحنا عاملين زي الصراصير
اضف إلى ذلك ظاهرة البلطجية وانا مش عارفة الداخلية قاعدة تعمل ايه وكمية البلطجة دي في الشارع ماتلموهم في السجون البلطجية دول هي دي مش شغلتكم .
لو كان هناك ثمة رسالة توجهينها لمن ؟
اوجهها للجميع للمسئولين والشعب عايزين نرجع زي ما كنا باخلاقيات زمان الحلوة ولابد من قوانين تكون رادعة وتنفذ على الكل لضبط الانفلات في الشارع ونريد قانون يمنع التكاتك في القاهرة واسكندرية ويخلوه في الأقاليم بس وعايزين قانون يمنع التحرش ويغلظ العقوبات ويتم تطبيقها بالفعل القوانين الرادعة هي التي تضبط أي مجتمع .
