بقلم / كريمة الشقري ،
بعد ما وضبت الأخلاق قلت رزقي على الرزاق ، دي أخلاق أهل زمان بس حديثة لكل أوان، أما أعرضهم في الدكان .وسمعت صوت عم حسين بيقول (بيكيا) قولتله فين .؟ يارب تكون ياعم حسين جبتلي حاجة أو أتنين ، تتوضب وتبقى تمام وأهو نزود الدكان. أيوه لقيتلك حاجة تمام، ببص لقيتها…الإحترام .قلت أزاي دا أسمه كلام ؟ ده استغنوا عنه كمان .؟ حتبقى حياتنا ايه من غير احترام ؟ إحترامي لأبويا ولأمي وأخويا ، أحترامي لنفسي ولأصحابي وأهلي .قلت إزاي ياعم حسين ،الناس دي مخها راح فين ؟ قاللي يابنتي دا شيئ معروف ، بقى يتفسر جبن وخوف .قلت إزاي بس ياعم ، كده عيشتنا بقت غم والفوضى خلاص حتعم .
اسمعوا مني الكلام انا وضبت الإحترام وراح ينفع دا الزمان . زمن إللي مالوش كبير ، وميعرفش يعني ايه احترم الكبير . احترامنا متبادل ميفرقش مابين ست وراجل، بس للي شايف نفسه ، حتوقرني حوقرك ، حتعوج حكدرك .احترام يعني المهابة من غيره حياتنا غابة . وسلام واشوفكوا بكرة ويارب أرزقني فكرة .
