بقلم / كريمةالشقري ، 
ليه بقت كل حاجة حلوة كنا بنعملها زمان بتتفهم غلط والأخلاق الطيبة بقت عبط. زمان كنت لما تلاقي جارك شايل شيلة تجري تاخدها منه وتوصله بيها ، دلوقتي لأ وتقول لنفسك هوه أنا شغال عنده ، زمان كنت لما تعمل أكلة حلوة تبعت لجارك طبق وأكلة هنية تكفي مية ، دلوقتي تخاف لجارك يحسدك أو يفتكرإنك مستني الرد.
زمان كنا بنفرح مع بعض ولبعض وكنا بنزعل علشان بعض.
زمان كانت لمتنا حلوة ودلوقتي فين وفين لما العيلة تتجمع ولوسألت يقولوا مشاغل والله،،،؟ هوه زمان مكنش فيه مشاغل ، بالعكس كانت اكتر من دلوقتي بس النفوس كانت صافية ورايقة.
زمان كنا بنتجمع في مكان ضيق بس كانت نفوسنا تسع من الحبايب ألف ، دلوقتي والله الواحد منا يادوب نفسه سيعاه ،، جرى أيه ؟ هوالعيب في مين ؟ فينا دلوقتي وألا زمان إللي كان حلو أوي ،،،؟
