اخبار الرياضة
مساء الخير كابتن فايلر متستغربش لما تلاقينا إحنا نفس الجماهير اللي انتقدت
كتب..عاطف أنيس
اختيارك من قبل اللجنة الفنية اللي من ضمنهم أنا، مع أول ماتش بتدعمك، وجايز انت فهمت دا من شرط تحقيق الدوري وأفريقيا.
إحنا جماهير مبتطلبش المستحيل، بس مبتحبش تعيش في وحل الانحدار في المستوى لفترة كبيرة، مش شخصيتنا ولا طبيعتنا..
كل اللي انتقدوا اختيارك كانوا بيتمنوا مدرب بسي في أقوى منك ودا منطقي لجماهير طموحة جدًا بحجم طموح واهداف فريقها المصنف رقم 1 في أفريقيا ومصنف الثاني في عدد البطولات القارية على مستوى العالم.
الجماهير اتقسموا في وجهة نظرهم ما بين ناس قالت يمكن ينجح زي جوزيه، وناس خافت من تكرار تجربة لاسارتي ويول وبيسيرو والبقية.. لكن دلوقتي كلنا هنبقى في صف واحد، مصلحة الفريق.. عمرك ما هتلاقينا انتقدنا وهنقعد نهاجم ونمسكلك في السقطة واللقطة عشان نثبت وجهة نظرنا، لا بالعكس مصلحة الفريق قبل أي شيء، وكل اللي انتقدوا انتدابك كمدرب بيتمنوا بكل ما أوتوا من قوة إن انتقادهم يطلع في غير محله وإن وجهة نظرهم تبقى غلط، عشان إحنا بننتقد عشان الأهلي مش عشان أي شيء تاني!!
إحنا هنشيلك فوق راسنا لما نلاقي تطور وتحسن في آداء الفريق، استعادة شخصية الأهلي وهيمنته محليًا سواء كان أو قاريًا.
إحنا مبنعملش أساطير وهمية، ولغتنا مش بس الأرقام ونتايج المباريات والدوري مش إنجاز بالنسبة لينا، إحنا لغتنا إننا الكبار في اللعبة في أفريقيا فـ بطبيعة الحال بيتحتم علينا نكون الأحسن في الآداء، الأعلى في المستوى، والكل يعملنا ألف حساب.. وبعد كدا حتة النتايج دي مبنقدرش نحاسب عليها لأن أحيانا بيصادفك سوء توفيق (مش اهمال)، لكن بحكم الشخصية والقيمة على مر التاريخ بنقدر نتخطى المراحل الصعبة.
عزيزي فايلر.. هنهتف معاك حتى الرمق الأخير، كُن للأهلي مخلصًا، سترى دعم لم تحظى به في حياتك في أي فريق ولك في من سبقوك ألف دليل.. وتذكر جيدًا “الأهلي ملك لمن صنعوه، من صنعوه هما جماهيره”.