كتب..عاطف أنيس
من ساعتين أثيوبيا أخرجت لسانها للكل، وأعلنت رسميا بدء ملء سد النهضة وقالت مفيش قوة هتقدر تمنعنا، ونهر النيل بتاعنا والباقي مش تبعنا.
السيسي بعدها عقد اجتماع بقادة الجيش وقالهم استعدوا لأي مهمة قتالية لحماية أمن مصر القومي.
احنا بقى عملنا إيه؟.. للأسف لسه مشغولين بحلقة حسن شاكوش مع أحمد موسى وأغنية عود البطل، ولسه بنسخف ونتريق على سفر وزيرة الصحة للصين، ولسه مشغولين بحاجات ملهاش أي تلاتين لازمة.
للأسف بجد، عندنا أزمة في أولوياتنا، منعرفش نتكلم في إيه امتى وإزاي.. منعرفش نركز على إيه ونعمل من إيه قضية رأي عام.. للأسف بنهتم بأغاني المهرجانات أكتر من اهتمامنا بقضايا مصيرية للشعب والدولة.
للأسف.. بنمسك في حاجات تافهة ونعمل منها قضية وتلاقي الكل بيجري وراها وسايبين حاجات تانية أهم مليون مرة.. بقى عندنا لا مبالاة رهيبة وعدم اهتمام بقضايا المفروض احنا أول ناس تهتم بيها.
بلطجة أثيوبيا جزء أساسي منها إننا مش مهتمين أصلا بسد النهضة ومشغولين بقضايا تافهة، لكن لو هي شايفة حشد للرأي العام ودعم كامل لإجراءات الحكومة والقوات المسلحة مش هتفكر بالطريقة القذرة دي.
تقتكروا لو السيسي عايز ياخد قرار ما، ضد أثيوبيا.. مش هيكون محتاج الأول ظهير شعبي يتسند عليه.. لو عندنا اهتمام بسد النهضة وعاملين تريند لدعم الجيش في مواجهة بلطجة أثيوبيا، تفتكروا وقتها هيحصل إيه؟.
نفسي مرة يكون تركيزنا واهتمامنا بحاجات مهمة في حياتنا.. مش كل حاجة ناخدها بهزار وسخرية وتسخيف وتريقة ونسيب موضوعات أهم رغم إنها مرتبطة بحياتنا.
ليه منبقاش زي باقي الشعوب عندنا وعي ونشوف إيه بيحصل حولينا ومين بيتآمر علينا ونقف ضده ونضغط لحد ما مطالبنا تتحقق.. لو استغلينا قوة صوتنا واتوحدنا على هدف وركزنا على طلب معين محدش هيقدر يقف في وشنا.. وكلنا عارفين إن السوشيال ميديا أصبحت المحرك والداعم الأقوى لأي قرار.. معقولة تكون بلدنا في حالة حرب واحنا عاملين من بنها؟.. تفتكروا أثيوبيا بتفكر فينا ازاي دي الوقت؟.
تفتكروا مين أولى بالتريند.. دعم الجيش في مواجهة بلطجة أثيوبيا ولا حسن شاكوش في مواجهة هاني شاكر؟
