كتب..عاطف انيس
أصل الموضوع أعمق وأشمل وأكبر من فكرة إنه مُجرد فريق كورة بيفرحك وقت المكسب ويزعلك وقت الخسارة ولا هي حكاية بطولات وأرقام وإنجازات وكؤوس وبس .!
الأهلي اللي هيخليك تظبط مواعيد يومك علي وقت الماتش بتاعه واللي يسألك هتعمل إيه النهاردة هتقوله علي البروجرام بتاعك فـ اليوم بس هتشيل منه الساعتين بتوع الفُرجة علي الأهلي
الأهلي اللي قادر ينسيك كل الهموم والضغوط والظروف والمتاعب اللي بتقابلك فـ حياتك بمُجرد ماتفتكر إنك هتشوفه النهارده
الأهلي اللي كفيل إنه يغير مودك ١٨٠ درجة فـ يوم واحد ؟!
قبل الماتش متوتر وقلقان وبتفكر وفـ وسط الماتش مشدود
وعلي أعصابك ومش مستحمل وبعد الماتش لو كسبان بتبقي فرحان وعايز تحضن الدنيا كلها ولو خسران بتبقي مش طايق نفسك ولا عايز تشوف حد ولا تكلم حد و ک إنها نهاية العالم
الأهلي اللي هيحرق أعصابك من طول الإنتظار وإنت قاعد مستني من أول اليوم تشوفه فـ ماتش مهم وصعب وحساس وبتبقي حاسس إنك عايز تزق الوقت وتخلي الساعة تجري عشان تترحم من التفكير
الأهلي اللي لو إنت متجوز ومخلف ممكن تلاقي نفسك غصب عنك بتزعق لـ عيالك عشان بيعملوا دوشة وقت الماتش ولو كسب الأهلي بتبقي عايز تنزل تجيبلهم الدنيا كلها
الأهلي اللي هيخليك تقوم تحضن ناس علي القهوة لا تعرفهم ولا يعرفوك لما تريكة يجيب هدفه القاتل فـ آخر دقيقة عشان نكسب أفريقيا من قلب رادس ونروح اليابان
الأهلي اللي هيخليك تشد فـ شعرك وتكسر كل اللي حواليك من الفرحة لما متعب يجيب هدف فـ آخر ثواني فـ ماتش كل الظروف فيه كانت ضدك عشان نكسب الكونفيدرالية ونبقي أول فريق مصري يفوز بيها
الأهلي اللي هيخليك تنط من فوق سور المدرسة عشان تدور علي قهوة تتفرج فيها علي ماتش ليه فـ كأس العالم للأندية ولو فـ شغلك هتجري زي المجنون تسأل عن راديو عشان تتابع الماتش وتعرف النتيجة كام كام ؟
الأهلي اللي لو بيلعب حتي ماتش ودي مع فرقة درجة تانية وفـ نفس التوقيت في كأس عالم بيتلعب هتلاقي نفسك لا إرادياً عندك شغف غير طبيعي إنك تتفرج علي الأهلي و ک إن مفيش فـ الدنيا كلها اللي يعوضك عن رؤية معشوقك الأول والآخير
الأهلي علمنا نحب الحياة 
