حفلة كريسماس
_______________
عين الركايا بكاية
ع الكوباية والبرّاد
و حطبة سمرة مسمسة
و بوصة بيضة مقسمة
و كومة قش هما الزاد
لسّاها دايرة بالطبول
واهبة الندور
ينادي طيفها ذكريات
عايشة واهمة نفسها
لو حد مرة يحسها
ولا يرجع ماضي فات
لما كان حواليها لمة
تملا ضحكتها بهمة
تربط الافراح حزام
تلقي فرحتها بترقص
لما تتلم الحكاوي
اللي غاوي واللي هاوي
واللي فارش للغناوي
ترفع الاجراس بشوقها
تبقي حفلة للكريسماس
كلنا دلوقتي فوتنا
كل ريحة من ريحتنا
حتي بيتنا
ناسي هو كمان ملامحي
كل صابع من كفوفي
كان له صبغة
مرة شامي ومرة قمحي
هيا قاعدة في حضن غيطنا
شمس بتراقب خطاوي
و القنايا و العصاري
و المغارب
و الميعاد اللي لايمكن
ينكتب من غير خطوطنا
كل دقة عايزة زقة
بالمحايلة بالمشقة
رافعة دعوة للسما
كل سكة لسة ساكة
الف تكة مشئمة
والايدين متعاصة حنة هيا
سُنة
لــــــــــــلشقا
و الشقشة
والزقزقة
امتي بقي
البس التوب الجديد
قلبي زوّق كل حتة
لسة مستية عيد
ليه ياطيري تروح تسافر
او تهاجر
ليه تغادر
حضن كنت له الوريد
لسة ظابطة كل ساعة
ع الاذاعة
لابسة فستان الامل
مهما طال الجسر بينهم
مركبة فاقدة الملـل
ماضي عدي بالمعاندة
راكعة ساجدة
في حضن غيط
لسة بتمناني اسهر لو
دقيقة
وسط احضان الجريد
