كتب / محمد فتحى
انا محمد انا ابرام
حسوا بينا حرام
عارفين احنا مين
احنا مرضى اورام
مريض عمال اتألم
موجوع و مش بتكلم
كاتم الحزن جوايا
راضى بحالى و مسلم
ليه المرض اللى صابنى
دخل جسمى و ما سابنى
عمال يهد فيا
مع انى بحاول ابنى
ما بين النهار و الليل
جرع كيماوى و تحاليل
اهين و الف ااااااااااه
مريض انا و عليل
عايش حياتى بموت
بصرخ من غير صوت
حزين على نفسى
لكن بعمل مبسوط
الاطبا احتاروا معايا
مش عارفين دوايا
يارب خفف عنى
نار قايدة جوايا
يارب ليك محتاج
عندك انت العلاج
بتضيع منى الصحة
اللى قالوا عليها تاج
عمال ادمع و ابكى
لمين يارب هحكى
مفيش غيرك انت
ألجأ ليه و اشكى
يارب انت الطبيب
خليك منى قريب
شعرى فارق راسى
ياريته كان بيشيب
يارب انت الشافى
مفيش غيرك العافى
محتاج لمسة من يدك
يا تاخدنى فى حضنك الدافى
كلمات : محمد فتحى
