يا معلمني

كتب – عادل عز

يا معلمني أحب الدنيا
مهما تكون قساوتها معايا
أنت النور وانت الحنية
واللي وجودك كل هنايا ….
……….
يا معلمني أقدر أقاوم
كل مشاكلي ليل ونهار
وآخد رأيك واعرف أداوم
وابقى قوية ف كل قرار ….
………
يا معلمني أكتب أشعار
كل ما افكر فيك واتأمل
بلقى كياني داب واحتار
واكتب كلمه ألقاك بتكمل …
……….
يا معلمني صلاة الحب
وانا ف عينيك جوه المحراب
شفت ف حبك أطهر قلب
ولقيت حضنك أغلى مناب ..
…………
يا معلمني الحب اتوصى
خليك جنبي وماتسبنيش
ده انا محتاجه مليون حصه
أحفظ درسك واقدر أعيش ….
……..
أوعى تفكر إني هاذاكر
علشان أنجح ولا انساك
ده انا جيالك قاطعه تذاكر
بس سقطت خلاص ف هواك …
…….
بس
سقطت
خلاص
ف هوااااااك …
…………..
يا معلمني ….. قصيدة حنان إبراهيم الكاشف
……..
يا معلمني كلام الحب
ف أول لحظه شفت عينيك
رغم عذاب و جراح القلب
شافك قال شبيك لبيك …..
……
يا معلمني اعزف ألحان
على أوتار بحر العشاق
وانسى الدنيا واهيم سرحان
واحضن طيفك وانا مشتاق
…….
يا معلمني أطير ف سماك
واحضن قلبك تحت جناحي
قلبي يرفرف وانا وياك
يسهر جوه عينيك صَبَّاحي ..
……..
يا معلمني حروف الجر
كل ما أضمك فيا تضم
وانسى اسايا وعمري المر
وافدي هواك بالروح والدم ..
…….
يا معلمني حياة الروح
قرب مني وبطل تتقل
انت علاج قلبي المجروح
وأنت جوابه قبل ما يسأل ..
……..
وحياة حبك وحنان قلبك
كل علام الدنيا نسيته
كل دروسها كانت قبلك
قسوه وظلم ف قلبي داريته
………
يا معلمني أدوب ف هواك
واعزف لحن هواك ع الناي
قلبي وقلبك طاروا هناك
على نجماية عمري الجاي ..
……….
طب علمني أحبك أكتر
ولا أفكرش غير ف عينيك
ياللي كلامك زي السكر
ده انا والسكر بندوب فيك
أنا والسكر بندوب فيك