كلمات : محمد فتحى
فكرة : عمر فهمى
أسمعونى يا أهل طوة
عايزين نلم الشمل
فين المحبة اللى بقوة
اللى متتعدش زى الرمل
اللعبة كانت مرسومة
فى ورق الفتنة بقلم الشر
عايزين البلد مقسومة
لا ليها مرسى ولا حتى بر
ناس كتير راحت ضحية
فى فتنة هايفة و رخيصة
كل الهدف من المسرحية
الجامع يخسر الكنيسة
ده الصليب منور بالهلال
و الهلال منور بالصليب
اسمعونى يا اولاد الحلال
متعكروش اللبن الحليب
كلكم اخوات الحيط فى الحيط
احباب أصحاب فى نفس الشارع
ده حتى الغيط جانب الغيط
كمان الكنيسة جانب الجامع
مهما قطر الفتنة يدوس
حبل المحبة و الله جامد
هيفضل أبو جوارجيوس
أخو الشيخ فهمى و حامد
احنا اخوات فى المواطنة
أيوة أخوات مش أولاد عم
دى مارينا أخت فاطمة
الاتنين واحد من نفس الدم
اتكلم بقى و قول يا عمى حنا
رد على صبيان الفتن الطيش
قولهم بقى اى حاجة عنا
عرفهم أن بعد المحبة مفيش
يلاه تعالوا نضم الايد
تعالوا نكسر سم الفتنة
يد المحبة و الله حديد
يلاه نحافظ على محبتنا
فى آخر حروفى و كلماتى
قبل ما أكتب سطور النهاية
هفضل اقولها فى اغنياتى
تريزة هتفضل أخت آية
