شعر
“بعشق ترابك”
بسافر وأغادر
لا عارف لا قادر
اشوف حد غيرك يملي عينيا
وطول الطريق
في عشقك غريق
ياريت كان حبي وعشقي بإيديا
يا سمايا وارضي
وشجري ووردي
وشرفي وعرضي
انتي يا مصر
يا فرحي وهنايا
و املي ومنايا
و اجمل حكايه
بحبك يا مصر
تاريخك طويل
واسمك جميل
مالكيش بديل
ابدا يا مصر
شوراعك ونيلك
قرآنك و إنجيلك
حاجات عايشه فيكي بتوهب حياه
كلامك غناكي
وارضك سماكي
كفايه النظره فيكي ترد اللي تاه
يا بيتنا الكبير
يا عمار وخير
يا جامع ودير
حبيبتي يا مصر
يا ارضي وبلادي
يا حاضر وماضي
يا كايده الاعادي
بحبك يا مصر
يا املي وطموحي
وقلبي وروحي
تغيبي تروحي
في قلبي يا مصر
حاولت كتير اخبي
مقدرتش اداري حبي
وزاد الشوق في قلبي
خلاني كتبت عنك
ياللي في عز شبابك
ندم كل اللي سابك
وانا بعشق ترابك
وراحتي قربي منك
بعشق ترابك
كلمات الشاعر مينا وجيه
جميع الحقوق محفوظة
إصدار 2016